Metodica
En general
Per tscherner ils exercizis en il catalog d’exercizis stattan a disposiziun las duas categorias «Blessuras» e «Malsogna». Ulteriuras sutcategorias pussibiliteschan en in segund pass da resguardar la blessura u malsogna respectiva per uschia pudair tscherner ils exercizis adattads. I dat las suandantas sutcategorias:
- Blessuras: extremitads sut – extremitads sura – bist inclusiv extremitads sut – bist inclusiv extremitads sura
- Malsogna: mal il chau – mals da menstruaziun – malesser – mal il dies nunspecific – dafraid senza fevra – allergias
Plinavant è mintga exercizi attribuì a tscherts facturs da cundiziun resp. a la coordinaziun ubain a la schluccada.
Ils exercizis èn marcads cun colurs:
• cotschen = forza
• mellen = movibladad
• blau = cundiziun
• verd = coordinaziun
• pinc = schluccada
Per pudair far ils exercizis a moda efficazia èn remartgadas tar mintga exercizi variablas da grevezza. Ils exercizis vegnan fatgs en in ritmus ruassaivel e constat e sche pussaivel da tuttas duas varts. Per pudair identifitgar meglier ils exercizis han quels in titel ed in numer.
Diever cun u senza access a l’internet
Diever cun access a l’internet:
La pagina-web correspunda a las medias stampadas. Cun l’access a l’internet po il/la scolar/a dispensà/-ada a temp parzial guardar directamain online ils exercizis lubids e giavischads ed als far cun agid dals videoclips.
Diever senza access a l’internet:
Tut ils exercizis èn disponibels online sco document da pdf (vesair sutmenu «Documents» sin la pagina-web). Els pon vegnir stampads tenor categorias u sutcategorias. Per avair la survista recumandain nus da classar tut ils documents da pdf stampads en in ordinatur.
Ulteriuras infurmaziuns
Variablas da grevezza
Cun midar las variablas da grevezza fan ils exercizis effect en differents secturs (cf. chapitel «En general», penultim toc).
Las variablas èn:
• il pais
• il dumber da las serias
• il dumber da las repetiziuns
• il ritmus dal moviment
• las pausas
• il dumber d’exercizis
• la supercumpensaziun / la perioda da recreaziun
Criteris qualitativs
Ils criteris qualitativs servan sco punct da referiment, cura ch’in exercizi sto vegnir interrut. Divergescha l’execuziun dals exercizis dals criteris numnads, sto vegnir fatg ina pausa.
Ils criteris èn:
• posiziun da partenza correcta
• posiziun finala correcta
• ritmus dal moviment
• betg sminuir la tendida
Stancladad
Per ch’in exercizi saja effizient ed augmentia la prestaziun sto el esser stentus avunda per ch’i resultia ina stancladad e qua tras pli tard ina supercumpensaziun. Il grad da la stancladad daventa visibel tras caracteristicas subjectivas ed objectivas.
Indizis da stancladad subjectivs (percepids persunalmain)
• sentiment da strapatsch
• straccadad
• mancanza da forza
Indizis da stancladad objectivs (vesaivels da dadora)
• suar
• chau cotschen
• tremblitga dals musculs
• ils moviments na vegnan betg pli exequids correctamain
• difficultads da discurrer
Durada da las pausas
Ina pausa duai esser uschè lunga ch’il/la scolar/a è abel/-bla d’exequir in’ulteriura seria d’exercizis cun observar ils criteris qualitativs ed il dumber da repetiziuns pretendì.