Il project
Suenter ch’in uffant u giuvenil è stà malsaun u blessà èsi per ordinari gia spert puspè pussaivel da sa muventar en il rom dal sport en scola. Sch’ils uffants e giuvenils èn blessads mo levamain, pon els participar a moda adattada a l’instrucziun da sport en scola.
Il project ACTIVDISPENS® porscha a persunas d’instrucziun da sport in instrument per integrar uffants e giuvenils dispensads a temp parzial a moda correcta ed en in rom adattà activamain en il sport da scola. Ultra da quai dattan il formular da dispensa ed il catalog d’exercizis categorisà als medis la garanzia che uffants e giuvenils dispensads a temp parzial vegnian integrads en lur senn activamain en l’instrucziun da sport.
La finamira dal project è d’evitar l’inactivitad ed immobilisaziun dad uffants e giuvenils durant ina fasa ch’els èn blessads u malsauns.
Sa muventar, siglir enturn, tschertgar ses cunfins e far sport insumma – avant 20 onns sa chapiva quai da sasez per uffants e giuvenils. Oz è la situaziun dal tuttafatg autra. Uffants chattan en general adina pli paucs spazis per far termagls e sa muventar. Er en scola è l’instrucziun da sport suttamessa adina pli fitg al squitsch da spargn, i dat adina pli paucas purschidas e las pussaivladads vegnan pli pitschnas. Uffants e giuvenils èn corporalmain adina main activs e fan era pli pauc sport. Blers dad els sesan pli gugent a chasa e giaudan las numerusas purschidas multimedialas. E quai en ina vegliadetgna, nua che midadas decisivas dal crescher e madirar dal sistem dals musculs, dal skelet e dal sistem da la gnerva influenzeschan lur svilup.
Gist suenter ina blessura u ina malsogna crodan adolescents savens en ina rolla passiva. Il gust da sa muventar sa sminuescha. E savens èn quests eveniments ina stgisa bainvegnida per sa dispensar a temp cumplain e betg prender part al sport da scola. Ma gist en fasas da malsogna u da blessuras fiss il sport da scola e l’activitad colliada cun quel da gronda impurtanza, cunquai ch’il moviment sustegna a moda positiva la regeneraziun e la guariziun.
Il project ACTIVDISPENS® porscha als medis la pussaivladad da laschar participar uffants e giuvenils blessads u levamain malsauns a maun da dispensas a temp parzial definidas cleramain anc adina a l’instrucziun da sport. Ultra da quai duai il catalog d’exercizis categorisà visualisar activitads lubidas che uffants e giuvenils dispensads a temp parzial dastgan far en il rom da l’instrucziun da sport.
